तू दुर्गा तू स्वयंसिध्दा - समर्पण - भाग १

शरद आणि शीलाचा संसार उत्तम रीतीने चालला होता याचं कारण म्हणजे शरदराव पण कामसू वृत्तीचे होते. स्वभावाने शांत होते. ते आपल्या पत्नीला नेहमी
घरकामात सुद्धा मदत करायचे. मुलींवर जास्त बंधनं नसली तरी शिस्तीचा धाक होता. रेल्वेत नोकरी असल्याकारणाने त्यांनी बऱ्याच गोष्टींचा अनुभव घेतला होता. वेगवेगळ्या स्वभावाच्या व्यक्ती त्यांच्या सहवासात आल्या होत्या. कडक शिस्त असल्यावर मुली कशा विरुद्ध दिशेने वागतात तेही त्यांनी पाहिलं होतं. सुट्टीच्या दिवशी सगळे मिळून कुठेतरी फिरायला जात असत. त्यांच्यातल्या नात्यांची गुंफण खूपच सुरेख होती. शरदरावांना जसं जमेल तसं मुलींच्या लग्नासाठी थोडे थोडे पैसे ते बाजूला ठेवत असत. हळूहळू मुली मोठ्या होत होत्या. शालिनी वीस वर्षाची झाल्यावर तिने सुद्धा स्वतंत्रपणे स्वयंपाकाची कामं घ्यायला सुरुवात केली आणि ती वडिलांना हातभार लावू लागली. ते मात्र तिला मिळालेले सर्व पैसे बाजूला ठेवत असत. तिघींमध्ये शालिनी खूपच हळवी आणि इतरांना मदत करणारी अशी होती. कुणाचेही दुःख बघून ती स्वतःच दुःखी कष्टी होत असे.