तू तेव्हा तसा.. भाग २

" फ्रेंड्स?" समीरा आधी थोडी घाबरली. पण नंतर तिने आत्मविश्वासाने त्याच्या हातात हात दिला. नेहमी सुंदर आणि श्रीमंत मुलींच्या सोबत दिसणारा अनिश आता सतत समीरासोबत दिसू लागला. समीराचे बोलणे, वागणे त्याला आवडू लागले होते. समीराच्या मनातही त्याच्याबद्दल हळूवार भावना निर्माण होऊ लागल्या होत्या. ती आजकाल खास त्याच्यासाठी तयार होऊन यायला लागली होती. समीराचे हळूहळू अभ्यासातले लक्ष कमी व्हायला लागले होते. अनिश तिच्यासोबत असायचा पण त्याने स्वतःहून कधीही तू आवडतेस असे म्हटले नव्हते. नाही म्हटले तरी ही गोष्ट समीराला खटकत होती. प्रेम जबरदस्तीने होत नाही हे तिला माहित होते. एकाबाजूला अनिशचे प्रेमाने बोलणे आणि दुसरीकडे प्रेम आहे हे ही न सांगणे तिला कोड्यात पाडत होते. एक दिवस अचानक तिला मनातलं बोलायची संधी मिळाली. समीरा कॉलेजला आली होती. पण चालता चालता अचानक तिचा पाय मुरगळला. एवढा सुजला की तिला चालणे अशक्य झाले. शेवटी अनिश तिला घरी सोडायला निघाला. त्याच्यासोबत त्याच्या बाईकवर पहिल्यांदाच बसताना समीरा नाही म्हटलं तरी मोहरली होती. दोघे तिच्या घरापर्यंत पोहोचले. समीरा गाडीवरून उतरली. अनिश निघाला.