तुझं माझं ब्रेकअप

तो म्हणजे अलक... अलक पटनाईक. एका नामांकित कंपनीमध्ये सेल्समन म्हणून कार्यरत असणारा अलक थोडा गोंधळला होता. प्रश्न त्याच्या भविष्याचा होता. काय बरोबर काय चूक यापेक्षा त्याला सध्या त्याची मनस्थिती त्रास देत होती. एकतर कामातली परिस्थिती त्याची बिकट त्यात त्याचे नित्या सोबतचे रिलेशन काही महिन्यापासून फार बिघडले होते. त्या दोघांचे प्रेम गेल्या दोन वर्षात घट्ट होण्याऐवजी हातातून निसटूनच जात होते. आणि त्याला कारणीभूत होते अलकचे नेहमी गोंधळून जाणे, एका मतावर कधीच ठाम न राहणे. त्याला बांधिलकी अशी नको हवी होती. सुरुवातीला प्रेमाचे नवे दिवस अगदी छान जात होते. अर्थात, त्यावेळी एकमेकांना समजून घेणे आणि पहिलाच आयुष्यात आलेला हा गुलाबी अनुभव जगणे हाच उद्देश होता. परंतु, जस जसे दिवस पुढे जाऊ लागले तसं एकमेकांच्या उणिवा देखील जाणवू लागल्या. नित्या तिच्या परीने त्याला सांभाळून घेत होती. असं नाही की त्याचे प्रेम नव्हते नित्यावर. पण ते त्याला दाखवता येत नव्हते. दोघांचा खूप जीव होता एकमेकांवर. होता नाही अजूनही आहे. फक्त हा प्रेमाचा टॅग जो त्यांच्या नात्याला लागला होता तो हल्ली अलकला त्रासदायक वाटत होता. नात्याच्या जबाबदारीमध्ये त्याचा जीव गुदमरू लागला होता.