तुझ्याविना जगणार? भाग ३ अंतिम

'नेहा, काय अभद्र विचार करतेय ? तुझ्या मुलाकडे बघ. तुझ्याशिवाय त्याचं आहे तरी कोण? आणि तुझं आयुष्य इतकं कवडीमोल आहे का? जीव  देऊन सगळं संपवते म्हणे. पुन्हा असा विचार करू नको आणि  कोणत्या माणसासाठी रडतेय? ज्याने कधी तुला आपलं मानलं नाही. त्याच्या आयुष्यात तुझं स्थान कधीच नव्हतं. तुझ्या भावनांची किंमत केली नाही. हे असं कमजोर बनून अश्रू गाळण्यापेक्षा सांग त्याला मलाच तुझ्यासोबत संसार करायचा नाही. जा खुशाल जिथे जायचं आहे.
तू माझ्या आयुष्यातून निघून गेला तर माझं आयुष्य थांबणार नाही. नेहा, तुझ्याविना मी सुंदर आयुष्य जगू शकते. उलट ह्या नात्यात आल्यापासून तू जगणं विसरली आहे. मानसिकरित्या खचून गेली आहे. हुशार,कर्तृत्ववान नेहा चार भिंतीत स्वतःचं अस्तित्व हरवून बसली आहे. तू अशी नव्हतीच. शिकलेली मुलगी आहेस. तुझ्या आयुष्याची दोर तुझ्या हाती राहू दे.
ते नातं तुटलेलंच बरं ज्या नात्यात केवळ आणि केवळ घुसमट आहे.
ह्या नात्यात राहिलीस तर रोज मरशील.  तुझा जन्म ह्यासाठी आहे का? सावर स्वतःला, धीर दे. नवं क्षितिज तुझी वाट पाहतय. तुला उंच आकाशात भरारी घ्यायची आहे, तुझ्या पिल्लाच्या पंखात तूच ताकद भरायची आहे. आई म्हणून कणखर व्हायचं आहे. एक जीव तुझ्यावर विसंबून आहे नेहा.  त्याला कोणत्या प्रकारचं आयुष्य द्यायचं आहे हे ठरवणे तुझ्या हातात आहे.  असं पाऊल उचल की तुझ्या मुलाला तुझा अभिमान वाटला पाहिजे. तू त्याचा आदर्श आहे. हो तूच त्याचा आदर्श आहे."