तुम दे ना साथ मेरा.. ७

माधवरावांना शालिनीताईंनी त्यांना असं मधेच थांबवलेलं आवडलं नव्हतं पण त्यांनी शांत राहून संयम दाखवण्याचं ठरवलं. नंदिनीच्या वडिलांनी आनंदाने होकारार्थी मान डोलावली. आपली लाडकी लेक सरपोतदारांची सुन होणार या कल्पनेनेच नंदिनीच्या आईच्या डोळ्यात आनंदाश्रू आले. सर्वचजण खूप आनंदात होते. त्यांनी स्वराज आणि नंदिनीचे फोटो, मोबाईल नंबर एकमेकांना शेअर केले आणि थोड्याच वेळात माधवराव आणि शालिनीताईनी पुन्हा भेटू असं आश्वासन देत त्यांचा निरोप घेतला. नंदिनीच्या घरात आता आगळाच उत्साह संचारला होता. नंदिनीचं लग्न आता हा एकच विषय घरात चर्चेत होता; पण नंदिनी मात्र खिडकीजवळ उभी राहून शांतपणे बाहेर पाहत होती. तिला अजूनही विश्वास बसत नव्हता की, काही दिवसांतच तिचं आयुष्य एकदमच बदलणार होतं. तिला असं विचारात गढलेलं पाहून सुमित्रा तिच्याजवळ आली. तिच्या खांद्यावर अलगद हात ठेवला. तिच्या स्पर्शाने नंदिनी भानावर आली.