तुम दे ना साथ मेरा.. १३

तो काहीच बोलला नाही किंबहुना त्याला बोलायचं नव्हतं. चैतन्यला हाताशी धरून त्यांनी आपल्याच मुलाला फसवलं होतं. त्यालाही त्याचं उत्तर हवं होतं. नंदिनी त्यांच्या खोलीतून उठून बाहेर आली. घरात लग्नानंतरची लगबग सुरू होती. स्वयंपाकघरातून भांड्यांचा आवाज येत होता. कोणाकोणाचा चहा, नाष्टा सुरू होता. अंगणात पाहुण्यांची ये-जा होती. स्वराली अंगणात रांगोळी काढत होती. सगळ्यांच्या चेहऱ्यावर औपचारिक हसू होतं पण नंदिनीच्या मनात काल रात्रीची एकही गोष्ट शांत बसू देत नव्हती. ती चहाचा ट्रे घेऊन हळूहळू दिवाणखान्यात आली.