तुम दे ना साथ मेरा ५२

“मोठा भाऊ आणि वहिनी हे आईबाबांच्या ठिकाणीच असतात. जन्मदात्याइतकीच त्यांची जागाही महत्वाची असतेच हे मला नंदिनीकडूनच उमजलं. आई, ज्यावेळी आजुबाजूच्या बायका माझ्याबद्दल काहीबाही बोलत होत्या, तेंव्हा तिनेच मला आधार दिला. ‘बाळाला जन्म दिल्यावरच आई होता येतं असं नाही तर आईपणाची भावना जगताना दुसऱ्यांच्या मुलांना जीव लावून आई होता येतंच की..’ हे तिनेच मला शिकवलं. तिने माझ्यातला आत्मविश्वास वाढवला. माझ्यातल्या कलागुणांना जपण्याचा खूप मोलाचा सल्ला दिला. आज जी मी इतकं छान समजावू शकले ते केवळ तिच्याचमुळे.. नंदिनी खूप गुणी मुलगी आहे. एक चांगली लेक, हक्काची मैत्रीण, उत्तम गृहिणी, समजूतदार जाऊबाई, चांगली सुन सगळ्या भूमिका तीच उत्तम पार पाडू शकते. आणि हो तीच स्वराज भावोजीना सावरू शकते. तीच त्यांची परफेक्ट पार्टनर आहे. त्यामुळे त्यांच्या नात्यात कोणी कितीही मिठाचा खडा टाकण्याचा प्रयत्न केला तरी त्यांचं नातं कधीच तुटणार नाही. त्यांच्या दोघांच्या नात्याला कधीच तडा जाणार नाही. समजलं का मीरा?”