तुम दे ना साथ मेरा.. ८

“आई, आबा.. तुम्हीच सांगा, तुम्ही म्हणाला होतात ना, लग्न होण्याआधी मुलं एकमेकांना भेटतात, बोलतात आणि मग त्यांच्या पसंतीने लग्न जुळवलं जातं. मग आता काय झालं? मलाही त्याला भेटून, बोलून पुढचं ठरवायचं असेल तर माझं चुकलं कुठे? पण त्याच्याकडे मला भेटायला वेळच नाही. तो गावाला येणार नाही असं म्हणतोय. तुम्हाला हे बरोबर वाटतंय का?”

नंदिनीचा नाराजीचा सूर पाहून सुमित्रा थोडी हबकली.

“पण बाळा, ते माधवराव सरपोतदार आहेत. आपल्या जिल्ह्यातील एक प्रतिष्ठित व्यक्ती आहेत. त्यांच्या शब्दांना काही वजन असेल की नाही?”