त्या वळणावर..( भाग:-५ अंतिम)

तिच्या चेहऱ्यावरील प्रश्नार्थक भाव ओळखत ते म्हणाले," आज जो रमण आम्ही पाहतोय ते फक्त तुझ्यामुळे. तो आयुष्याकडे गांभीर्याने पाहायला लागला, जबाबदारीने वागू लागला. नियमित सगळे काही करू लागला. सर्वात महत्त्वाचे म्हणजे आमच्या बापलेकातील नात्यातील अंतर तू काढून टाकलेस. त्याच्यातील बदल मला दिसत होते. ते कोणामुळे हे मी शोधणार होतोच ; आता शोधावे लागणार नाही. मला माहित आहे हा समाज तुमच्या प्रेमाला मान्यता देणार नाही ; पण मला समाजाशी काहीही देणं घेणं नाही. मला फक्त माझ्या मुलाचं सुख पाहिजे जे तुझ्यात आहे. मला माहिती आहे तुझं ही त्याच्यावरती प्रेम आहे. तुमच्या दोघांच्या सुखातच माझं सुख आहे. चल बेटा, घरी चलं. तुमच्या नात्यातील अंतर दूर करून कायमस्वरूपी नात्यात बांधण्यासाठी, माझ्या रमणच्या आयुष्यात खुशी आणायला."