टायपिंग ! पार्ट 1

सर्वजण हसले. विजय पवार हा मूळचा लातूर जिल्ह्यातील " कासार शिरसी " गावातला सर्वसामान्य शेतकरी. मुलाचा जन्म होताच त्याची पत्नी वारली. नातेवाईकांनी दुसरे लग्न करण्याचा सल्ला दिला. पण आपल्या मुलाला सावत्र आईचा जाच होऊ नये असे विजयला वाटत. त्यामुळे त्याने दुसरे लग्न न करता एकटेच रवीला वाढवले. रवीला स्वतःच्या पायावर उभे केले. शहरात नोकरी लागल्यानंतर रवी शहरातच स्थायिक झाला. विजय फार सरळ स्वभावाचा व्यक्ती होता. गावात त्याला विशेष मान होता. रवीने शहरातल्याच एका मुलीसोबत विवाह केला. विजयनेही कसलीच तक्रार केली नाही. आपल्यासाठी आयुष्यभर झिजलेल्या वडिलांना शहरात आणावे , त्यांची सेवा करावी अशी रवीची इच्छा होती. विजयलाही आता मुलाचा सहवास हवा होता. त्यामुळे विजय शहरात आला आणि रवीसोबत राहू लागला. रवीने विजयला नवीन स्मार्टफोन घेऊन दिला होता. पण विजयला तो फार वापरता येत नव्हता. शहरात विजयला एकटे वाटत होते. सोसायटीत राहणाऱ्या काही वृद्ध गृहस्थांसोबत त्याची ओळख झाली आणि त्यांनीही विजयला मनापासून स्वीकारले. आपण ग्रामीण भागात राहणारे असूनही त्यांनी मित्र म्हणून आपल्याला स्वीकारले याचे विजयला फार कौतुक वाटत होते.