अन् ती हसली ..... भाग - ११

तिने कालपासून घडलेला सगळा वृत्तांत सविस्तरपणे, रडत रडतच समीरला कथन केला.  आज सकाळी उठल्यापासून ते आता झोपायला येईपर्यंत, कमीत कमी दहा ते बारा वेळा, दरवाजा उघडण्याचे काम तिने केले होते.  सकाळपासून उभे राहून ती घरातली सगळी कामं आराम न करता, कशी करत होती, ते सांगितले.  तिने केलेल्या आई आणि सासू बद्दलच्या, तिच्या चुका सुद्धा तिने कबूल केल्या.  ती सर्वच बाबतीत चुकते आहे, हे तिने मान्य केले.  तिच्याकडून तिच्या आईवर खूप अन्याय झाला होता.  आईला तिने अगदीच गृहीत धरले होते आणि तिच्याकडून या वयात खूपच मेहनत करून घेतली होती.  तिच्यामुळेच आईच्या तब्येतीची हेळसांड झाली.  तिचे गुडघे जास्तच दुखायला लागले.  या सर्वाचे तिला खूप वाईट वाटत होते." वैभवी सर्व सांगता सांगता रडत होती तर, मध्येच रडता रडता सांगत होती.