उन्हाळी सुट्टी...... एक आठवण

" नमस्कार मी आशा, खमंग तडका या चॅनल मध्ये आपले स्वागत आहे. " या ओळीसाठी अगणित वेळा रिटेक घ्यावे लागत होते. बोलता बोलता कधी चॅनल चे चायनल होत असे, तर कधी खमंग तडका म्हणताना गडबड उडत असे. शूटिंगच्या वेळी मात्र अशा गमतीजमती होत, आणि हसता हसता सर्वांची पुरेवाट होत असे. व्हिडिओ शूट मध्ये कधी करणाऱ्याचा पाय दिसे तर कधी दुसऱ्या कोणाची सावली! कधी गॅसवर उतू जाणारा चहा!!
साहित्य उपलब्ध नसेल तर त्याऐवजी यासारखे दिसणारे दुसरे साहित्य वापरून वेळ निभावावी लागत होती. केक सजवण्यासाठी क्रीम मिळाली नसल्यामुळे अगदी आर्टिफिशियल फुलांनी केकची सजावट करावी लागली होती. पण या सगळ्यांमध्ये पेरकर कुटुंबाचा वेळ मजेत जात होता. वेगवेगळे पदार्थ चाखायला मिळत होते.