उर्वशी पुस्तक समीक्षण

आपण अप्सरा अप्सरा सहजपणे म्हणत असतो; पण त्या अप्सरेच्या जीवनाची कहाणी लेखिकेने थोडक्यात पण प्रभावीपणे मांडली आहे. स्पष्ट, तेजस्वी, बुद्धिमान, अभिमानी, बंडखोर लावण्यवती असलेल्या उर्वशीला वाचणे हा नक्कीच एक वेगळा वाचन अनुभव आहे. मानवी स्वभावानुसार मनुष्य बरेचदा आपल्याकडे जे आहे त्याच्या अगदी विरुद्ध गोष्टीकडे‌ आकर्षित होतो किंवा असे म्हणता येईल की मानवी मनावर त्या विरुद्ध गोष्टींचा भलताच प्रभाव पडतो; परंतु ही गोष्ट या कादंबरीच्या निमित्ताने लेखिकेने अगदी सहजतेने मांडली आहे. चिरतरुण आणि मर्त्य विश्व, दोहोंमधील प्रेम या शब्दाची व्याख्या निरनिराळ्या पात्रांच्या माध्यमातून व्यक्त होते. कुठेतरी स्वर्गलोक आणि मर्त्यलोकांतील जीवनातील समान धागेदोरे गवसल्यासारखे वाटते आणि स्वर्ग बरा की आपले मर्त्य विश्व... असा विचार मनात डोकावून जातो. पुस्तकातील लहान वाक्यरचना प्रभावी वाटते. लेखिकेने एकूणच वर्णन, शब्द, वातावरणनिर्मिती उत्तमरीत्या अन् हळुवारपणे हाताळली आहे. भाषासौंदर्य प्रेमात पाडणारे असले तरी कादंबरीचा शेवट कुठेतरी मनात अस्वस्थता अन् प्रश्न निर्माण करणारा वाटू शकतो.