उत्तुंग भरारी

नरसिंहराव सरकारी वकील. अत्यंत हालाखीच्या परिस्थितीतून आलेले सद्गृहस्थ. त्यांच्या बालवयातच त्यांच्या आई वडिलांनी जगाचा निरोप घेतला होता. त्यांच्या मोठय़ा बहिणीला जन्मदात्रीच्या स्थानी मानून त्यांच्या आयुष्याच्या संघर्षाची सुरुवात झाली. तल्लख बुद्धिमत्ता व अत्यंत कठोर मेहनतीची काठी घेऊन त्यांनी या काटेरी आयुष्याच्या वळणावर चालायला सुरुवात केली. पण, हा विधाता त्यांचे कष्ट बघत असणार आणि म्हणूनच त्याने त्यांचे वकिलीचे शिक्षण सुसह्य केले व सरकारी वकील म्हणून मानाचा मुकुट त्यांना मिळाला. ते अतिशय नावाजलेले वकील होते. एक-एक आण्याची पण किंमत असणारे नरसिंहराव त्यांच्या पक्षकारावर कधीही अन्याय होऊ देत नसत. भला माणूस, विद्वान, प्रामाणिक व अत्यंत निष्ठावान वकील अशी त्यांची ख्याती होती. नलूताईदेखील नरसिंहरावांना अतिशय साजेशा. मृदु बोल, सहनशीलता, माणसांना जोडण्याची कला, तडजोड वृत्ती, आस्तिक, गृहिणींच्या सर्व कर्तव्यात अग्रेसर.