वाड्यात येऊन जा.. भाग ९

"आता तुम्ही दोघांनी एकमेकांना अंगठी घाला." गुरूजींनी सांगितले. अक्षतने आर्यनकडे अंगठी आणून दिली. आर्यनने मयुरीकडे बघितले. आकाशी रंगाच्या लेहंग्यामध्ये ती खुलून दिसत होती. त्यावर तिने केलेला हलकासा मेकअप. घातलेली मॅचिंग ज्वेलरी. खूपच सुंदर दिसत होती ती. तो भान हरपून तिच्याकडे बघत होता. सगळेजण तो कधी अंगठी घालतो आहे याची वाट बघत होते. आर्यन मूर्खासारखा तिथे उभा आहे हे बघून अक्षतने त्याच्याजवळ येऊन चुटकी वाजवली. सगळे आपल्याकडेच बघत आहेत हे बघून आर्यन गोरामोरा झाला. त्याने मयुरीला हात पुढे करायला सांगितला. तिने मानेने नकार दिला. आर्यनच्या कपाळावर घामाचे थेंब जमा होऊ लागले.