वाड्यात येऊन जा.. भाग ३८

"तू आणि ही पालवीताई खूप दमला आहात आज. आराम करा. आम्ही बघतो सगळं."
सगळ्यांची जेवणं होताच म्हादबाने दिवाणखान्यात सगळ्यांना बसण्यासाठी सोय करून ठेवली. स्वयंपाकघर वगैरे आवरून सगळेच बैठकीत येऊन बसले. माधवराव मधोमध बसले होते. त्यांच्याशेजारी बसलेले विनायकराव अडकित्त्याने सुपारी फोडत होते. पालवी राजच्या शेजारी बसली होती. जुई स्पृहाच्या पाठीपाठी करत होती. विराज नीताताईंसोबत काहीतरी बोलत होता. आर्यन भिंतीला टेकून हे सगळं बघत होता. हे सगळं आधी कधीतरी झालेलं आहे, असं त्याला आतून वाटत होतं. कधी ते तो आठवायचा प्रयत्न करत होता.