वाड्यात येऊन जा.. भाग ४६

इकडे पेशव्यांना घेऊन चंद्रसेन निघाला खरा. पण वाड्यात काय व्यवस्था असेल यासाठी त्याच्या मनात धाकधूक होती. वाड्याजवळ येताच त्याचे बदललेले रूपडे त्याच्या नजरेत आले आणि त्याची मनस्थिती क्षणात बदलली. इतका वेळ चिंतित असलेला त्याचा चेहरा खुलला. प्रवेशद्वाराशी येताच पाच सवाष्णी समोर आल्या. त्यांनी पेशव्यांच्या पायावर पाणी घातले. त्यांना औक्षण केले. त्यांच्यासोबतच चंद्रसेनचे देखील औक्षण झाले. वाड्यात येताच चंद्रसेनचे डोळे विस्फारले. थोड्याच कालावधीत आतली रचना बदलली होती. लोड, तक्तपोशी सगळे व्यवस्थित लावून ठेवले होते. धुपाचा सुवास दरवळत होता. पाण्यात ठेवलेली सुगंधी फुले वातावरण अजूनच सुगंधी करत होती. पेशवे आसनस्थ होताच सेवक गूळपाणी, दूध आणि वेगवेगळे पदार्थ घेऊन सामोरे आला. पेशव्यांनी आणि त्यांच्यासोबत आलेला लवाजमा यांचे खाणे होत असतानाच चंद्रसेनने महादेवाला शोधले. तो दिसताच त्याला घेऊन तो एका बाजूला गेला.