वाड्यात येऊन जा.. भाग ४७

लग्नाचा मुहूर्त निघताच तिन्ही ठिकाणी जोरदार तयारीला सुरुवात झाली. दोन्ही लग्नघरी आणि गोविंद भटांकडे सुद्धा. लग्न झाल्यावर लगेचच ते हिमालयाकडे प्रस्थान करणार होते. तोपर्यंत त्यांच्या पूर्ण घराची जबाबदारी चंद्रसेनाने घेतली होती. त्याआधी खूप महत्वाचे काम त्यांना हातावेगळे करायचे होते. ती शक्ती त्यांना अश्याप्रकारे लपवायची होती की सामान्य कोणीही तिला शोधू शकणार नाही. त्यासाठी त्यांनी एका खास दालनाची निवड केली. गोविंद भटांनी त्या दालनावर वेगवेगळी बंधने टाकून ते दालन इतरांसाठी अदृश्य केले. म्हणजे इतरांना दिसताना तिथे भिंत दिसायची. पण त्यामागे एक क्रूर शक्ती सुप्तावस्थेत होती. त्या जागेची खूण समजावी म्हणून एक भलेमोठे तैलचित्र तिथे लावण्यात आले आणि ती शक्ती हा विषय वाड्यात बंद झाला.