वाड्यात येऊन जा.. भाग ६८

स्पृहाचे शूटिंग सुरू झाले. सकाळी कॉलेजला म्हणून जी ती निघायची ती थेट संध्याकाळी घरी पोहोचायची. उशीर का होतो याचे कारण तिच्याकडे तयार होते. जास्तीचा अभ्यास. त्यामुळे घरातून कोणी तिला काहीच बोलत नव्हते. विराज तर बिचारा स्पृहाने आपले ऐकून सिरियलचा नाद सोडला या भावनेने सतत तिच्या मनाप्रमाणे वागायचा प्रयत्न करायचा. पायलट भाग शूट होत होते. स्पृहामध्ये एक कसलेली अभिनेत्री होती. तिच्यावर जास्त कष्ट न घेताच ती दिग्दर्शकाला हवे तसे काम करत होती. त्यामुळे अख्खी टिम तिच्यावर खुश होती. तिची मात्र भिती दिवसागणिक वाढत होती. प्रोमो दाखवायची तारीख जवळ येत होती. घरात तिने परत हा विषयच काढला नव्हता. त्यामुळे त्यांचं मन वळवणे वगैरे प्रकार शक्यच नव्हते.