वाफेवरचे साबुदाणा पापड Recipes In Marathi

कृती - साबुदाणा चांगला दोनदा पाण्याने धुवून घ्यायचा आणि नंतर थोड पाणी घालून नेहेमीप्रमाणे भिजत घालून ठेवायचा जसे आपण खिचडी करायला भिजवतो तसा. शक्यतो रात्रीच साबुदाणा भिजवावा म्हणजे छान मऊ भिजतो. आता सकाळी साबुदाणा चांगला भिजल्यावर त्यात चवीप्रमाणे मीठ घालून एकत्र करून घ्यायचं. आता इडली पात्रात अगदी थोडे तेल लावून घ्यायचे आणि मग बरोबर त्या गोलात साबुदाणा पसरवून घालायचा. जास्त घालायचा नाही अगदी एकेरी लेयर घालायची म्हणजे साबुदाणा चांगला वाफवून निघतो आणि कच्चा राहत नाही. आता इडली पात्रात खाली पाणी घालून मग त्यात एक एक स्टँड ठेवायचे आणि चार ते पाच मिनिटे वाफवून घ्यायचे. साबुदाणा पापड वाफवून झाल्यावर सिलिकॉन स्प्याचुला किंवा मग स्टीलच्या गोलाकार चमच्याला तेल लावून पापड अगदी अलगद काढून घ्यायचा. नंतर एक एक पापड प्लास्टिक कागदावर वाळत घालायचे. दोन दिवस चांगले उन्हात वाळल्यावर डब्यात साठवून ठेवायचे. उपवासाला खायला हे साबुदाणा पापड खूप छान लागतात.