वाईटातून चांगलं _ भाग १

मनालीला बीकॉम झाल्यावर तीन वर्षांनी सरकारी कार्यालयात नोकरी मिळाली त्यामुळे ती मनोमन खुश झाली. एकतर खऱ्या अर्थाने आता ती स्वतःच्या पायावर उभी राहिल्याचं समाधान तिला मिळालं आणि घरच्या सर्वसामान्य आर्थिक परिस्थितीत तिचाही थोडा हातभार लागणार होता त्यामुळे घरचे पण खूश होते. त्याआधी तिने खाजगी कंपनीत छोटी मोठी नोकरी केली होती. आता मनाली रोज सकाळी लवकर उठून आईला कामात थोडीफार मदत करून ऑफिसला जात होती आणि संध्याकाळी परत येत होती. नवीन ऑफिस चांगलं होतं. जुन्या काळची चार मजली इमारत असल्यामुळे लिफ्टची सोय नव्हती. एकाच इमारतीत वेगवेगळे विभाग होते. मनालीची पहिल्या मजल्यावरच्या अकाउंट्स विभागात नेमणूक झाली होती. तिच्या सारखीच नवीन चार-पाच डोकी सोडली तर इतर सर्वजण तिला सीनियर होते.