व्हाईट लिली - भाग १३

जुईलीने आशुतोषला मेसेज केला आणि आशुतोषने तिला शिकवायला सुरुवात केली. जुईली सगळे मेसेजेस स्टार करून ठेवत होती. मुळातच हुशार असल्याने आशुतोष जे काही सांगत होता ते तिला पटकन समजत होतं. आधीपासून कविता कथा लिहण्याची सवय असल्याने तिला कविता समजणं फारसं जड गेलं नाही; पण सातत्याने कविता लिहण्याचा सराव नसल्याने, ऑफिसमधल्या कामाच्या व्यापामुळे ती या क्षेत्रात थोडी मागे पडली होती. आशुतोष तिला वृत्तबद्ध कवितेचे प्रकार शिकवत होता. दर मंगळवारी तो नवीन काहीतरी शिकवायचा आणि मग पूर्ण आठवडाभर जुईलीकडून सराव करून घेत असे. आठवडाभर गृहपाठ केल्यावर मग पुन्हा दुसऱ्या मंगळवारी नवीन वृत्त शिकवलं जायचं. जुईलीने सुद्धा पुन्हा नव्या जोमाने लिहायला सुरुवात केली होती. आता छान लिहू लागली होती. मदतीला आशुतोष होताच. आपल्या मुलाला आनंदात पाहून शुभदाही खूष होती. लॉकडाऊन संपल्याशिवाय नोकरीबद्दल बोलण्यात काही अर्थच नव्हता.