शब्दांना धार नाही आधार हवा

कधी कधी माणूस आजारी पडतो तेव्हा त्याच्या अंगातला आजार जितका त्रास देतो, त्याहून जास्त त्रास त्याच्या मनाला होत असतो. शरीर दुखत असतं, ताप असतो, थकवा असतो; पण मनात वेगळाच गोंधळ चाललेला असतो. “हे बरं होईल ना?”, “आपण यातून बाहेर पडू का?”, “आपल्याला कोणी समजून घेणार आहे का?” असे अनेक प्रश्न न बोलता मनात फिरत राहतात. अशा वेळी औषधं आपलं काम करतातच, पण अनेकदा खरी गरज असते ती औषधांपेक्षा माणसाच्या शब्दांची.