या वळणावर...( भाग ३ )

मयुरी तीन तासांमध्ये पुण्याला काकाच्या घरी पोहचली. ती घरी आल्यामुळे तिचे काका, काकू आणि ऐश्वर्यादीदीला खूप आनंद झाला. थोडया वेळाने नाशिकवरून मयुरीची आत्या आणि तिची लेक स्पृहा देखील आल्या. स्पृहा सगळ्यांत लहान असल्याने दोन मोठ्या दीदींमध्ये ती सारखी लुडबुड करत होती. मयुरी तिचे खूप लाड करत बसली होती. काही वेळाने ऐश्वर्याचे मामा-मामी, त्यांचे दोन मुलगे तसेच धाकटी मावशी आणि तिची मुलगी रिद्धी आले. आता लग्नघर भरल्यासारखे वाटत होते. रात्री संगीतचा कार्यक्रम असल्याने मयुरीच्या काकूने दुपारचे जेवण लवकर आवरले आणि जबरदस्तीने ऐश्वर्या, मयुरी आणि स्पृहाला विश्रांती घेण्यासाठी ऐश्वर्याच्या बेडरूममध्ये पिटाळले. तितक्यात ऐश्वर्याला तिच्या होणाऱ्या नवऱ्याचा वरूणचा फोन आला. ऐश्वर्या थोडे लाजत, थोडे लाडात येऊन तिच्या नवऱ्याशी बोलत राहिली. झालं! जिजूंच्या फोनमुळे तिघींनाही आराम मिळाला नाही.