या वळणावर ( भाग ४ )

"राहुल, खरं सांगायचं तर मला लग्नच करायचं नाही. लग्नसंस्थेवर माझा विश्वास राहिला नाही. माझ्या बाबाला अभिनयाची आवड होती त्यामुळे त्याला त्या क्षेत्रात नाव कमवायचे होते. माझी आई भरतनाट्यम नृत्यामधे पारंगत होती, मात्र तिने आपल्या नवऱ्यासाठी आपली महत्त्वाकांक्षा बाजूला ठेवली आणि सुरुवातीला बाबा स्ट्रगल करत होता तेव्हा त्याच्या पाठीशी ठामपणे उभी राहिली.
माझ्या जन्मानंतर तिने तिचे आयुष्य संसारात गुंतवून घेतले. खूप छान होतं आमच्या तिघांचं विश्व. त्यांच्या लग्नाच्या सतराव्या वाढदिवशी बाबाने आईला कबुली दिली की तो त्याच्या सह-अभिनेत्री विनीमधे गुंतला आहे. आईने कुठलीही आदळआपट न करता शांतपणे घटस्फोट दिला. काय चूक होती आम्हा दोघींची? सांग ना राहुल! त्या क्षणापासून ठरवले की मी लग्नच करणार नाही." मयुरीने आपल्या आईवडिलांची सगळी कथा राहुलला सांगितली.