श्शू! आवाज कोणाचा? भाग ६

" नयना उठतेस का? आपण जायचयं डाॅक्टरांकडे."
नयनाने अर्धवट डोळे उघडून म्हटलं,
" प्रतिक मी आजारी थोडीच आहे डाॅक्टरांकडे जायला? तुला सकाळीच म्हटलं होतं."
नयनाचा सूर तक्रारवजा होता पण त्याकडे दुर्लक्ष करून प्रतिक म्हणाला,
" तू आजारी नाहीस हे मलाही कळतंय.पण तुझी झोप न झाल्याने तुला हा त्रास होतोय. तुझा आवाज बघ किती थकल्यासारखा येतोय."
" अरे त्या कानात येणा-या आवाजाने मला थकवलय.कळत कसं नाही तुला? तुला पण सांगून थकले.काय करू देवा !"
नयनाने डोळे मिटून घेतले.
प्रतिक तिच्याजवळ पलंगावर बसला आणि तिचा हात हातात घेऊन हळुवारपणे म्हणाला,
" नयना मला कळतंय त्या आवाजाने तू थकली आहेस.तो कसला आवाज आहे हे तर आपल्याला शोधायला हवं नं! त्यासाठी आपल्याला डाॅक्टरांकडे जायला हवं.आपण नाही गेलो तर हा त्रास वाढेल. तो वाढू नये म्हणून चल."